Útnefning Bæjarlistamanns Fjallabyggðar og afhending styrkja til menningarmála 2024

Ástþór Árnason bæjarlistamaður Fjallabyggðar 2024
Myndina tók Albert Gunnlaugsson.

Þann 15. febrúar sl. var bæjarlistamaður Fjallabyggðar formlega útnefndur en Markaðs- og menningarnefnd Fjallabyggðar samþykkti á fundi sínum þann 9. nóvember sl., að útnefna Ástþór Árnason Bæjarlistamann Fjallabyggðar árið 2024. Er það í 15. sinn sem nefndin útnefnir bæjarlistamann Fjallabyggðar.

Athöfnin fór fram í Menningarhúsinu Tjarnarborg í Ólafsfirði. 

Menningartengdum styrkjum var úthlutað í eftirfarandi flokkum: Styrkir til menningarmála, styrkir til hátíðarhalda og stærri viðburða og styrkir til reksturs safna og setra.

Bæjarstjórn Fjallabyggðar samþykkti að veita styrki til þessara þriggja flokka á árinu 2024 að upphæð kr. 11.990.000.-. Þar af fara kr. 2.640.000.- til einstakra menningartengdra verkefna, kr. 5.835.000.- til hátíðarhalda og kr. 3.515.000.- til reksturs safna og setra og þjónustusamnings vegna náttúrugripasafns. Áfram verður veittur styrkur til bæjarlistamanns og er upphæð hans óbreytt frá fyrra ári kr. 300.000.-

Í flokki fræðslumála samþykkti Bæjarstjórn Fjallabyggðar að veita styrki að upphæð 595.000.- og styrki til grænna verkefna að upphæð 2.500.000.-

Ægir Bergsson formaður markaðs- og menningarnefndar setti hátíðina og Linda Lea Bogadóttir markaðs- og menningarfulltrúi flutti ávarp, afhenti styrkina ásamt Ægi og veitti bæjarlistamanni viðurkenninguna. Við athöfnina voru flutt glæsileg tónlistaratriði.  Fram komu þau Edda Björk Jónsdóttir sópran og Hörður Ingi Kristjánsson sem lék á píanó. Fluttu þau þrjú lög.  Að lokinni athöfn bauð Fjallabyggð gestum upp á léttar veitingar frá Kaffi Klöru í Ólafsfirði. 

Fjallabyggð þakkar fráfarandi bæjarlistamanni, Brynju Baldursdóttur hennar framlag til menningar og lista á árinu en allt árið 2023 vann Brynja að sýningunni Kom-andi á safn­anótt í Lista­safni Ein­ars Jóns­son­ar.  Með þess­ari sýn­ingu er Brynja að leit­ast við að skyggn­ast inn í órjúf­an­legt sam­spil komu og brott­far­ar, ei­lífa hringrás umbreyt­inga og and­ar­taks­ins þar á milli. Sýn­ing­in stend­ur til 25. ág­úst og eru íbúar Fjallabyggðar hvattir til að skoða sýninguna. 

Fjallabyggð óskar styrkhöfum velfarnaðar í þeim verkefnum sem framundan eru og Ástþóri Árnasyni innilega til hamingju með nafnbótina Bæjarlistamaður Fjallabyggðar 2024.

• Dagskrá hátíðar
• Bæjarlistamaður Fjallabyggðar ársins 2024 - Ástþór Árnason
• Ávarp Lindu Leu Bogadóttur, markaðs- og menningarfulltrúa
• Listi yfir veitta styrki úr bæjarsjóði Fjallabyggðar árið 2024
• Kynning á verkefnum sem hlutu styrki