Bæjarráð Fjallabyggðar

Skrifstofu- og fjármálastjóri lagði fram upplýsingar og samantekt á viðtölum þeim sem tekin voru við umsækjendur. Jafnframt var lögð fram tillaga skrifstofu- og fjármálastjóra, með rökstuðningi, að Kristinn J. Reimarsson verði ráðinn markaðs- og menningarfulltrúi Fjallabyggðar.
Bæjarráð samþykkti tillöguna samhljóða.

Bæjarráð samþykkir að fela bæjarstjóra að að óska eftir fundi með Mennta- og menningarmálaráðherra vegna málefna Menntaskólans á Tröllaskaga í aðdraganda fjárlagerðar.

Tekin var til umræðu staða og framtíð heilbrigðisþjónustu við utanverðan Eyjafjörð.

Bæjarráð samþykkir að fela bæjarstjóra að fylgja eftir viðræðum frá liðnum vetri um stöðu heilbrigðis- og öldrunarmála við utanverðan Eyjafjörð við heilbrigðisráðherra.

Lagt fram erindi m. tölvupósti 28. ágúst 2013, frá Eyrúnu Sif Skúladóttur, sem mun stunda nám við háskólann á Akureyri í haust, en hún vildi kanna hvort sveitarfélagið íhugi að greiða niður strætó fyrir námsmenn sem vilja búa í sinni heimabyggð og nýta sér þjónustu þar.

Skrifstofu- og fjármálastjóri lagði fram minnisblað til upplýsingar um fargjöld og reglur sem Dalvíkurbyggð styðst við.

Bæjarráð tekur jákvætt í erindið og vísar til fjárhagsáætlunargerðar 2014.

Í erindi Lyfjastofnunar dagettu 29. ágúst 2013, er leitað umsagnar sveitarfélagsins, vegna umsóknar lyfsöluleyfishafa Siglufjarðarapóteks um heimild til að reka lyfjaútibú í flokki 3 í afgreiðslu Heilsugæslunnar í Ólafsfirði.

Bæjarráð fagnar erindinu og veitir jákvæða umsögn.

Lagt fram minnisblað nefndar á vegum Eyþings um almenningssamgöngur dagsett 17.07.2013.
Einnig fylgigögn er tengjast málinu.
Það er megin niðurstaða nefndarinnar að forsendur fyrir verkefninu sem samið var um við Vegagerðina í desember 2012, séu ekki til staðar og endurmeta beri aðkomu Eyþings að því.

Tekið til afgreiðslu erindi Iceland Heliskiing sem frestað var á síðasta fundi bæjarráðs. Í tengslum við mögulega stofnun ferðaþjónustufyrirtækis með aðsetur í Fjallabyggð fyrir þyrluskíðamennsku lá fyrir ósk fyrirtækisins um samning um einkaafnotarétt á jörðum og landssvæði í eigu sveitarfélagsins, á tímabilinu 1. mars til 20. júní ár hvert.

Bæjarráð gerir ekki athugasemdir við áætlanir og hugmyndir umsækjanda um þyrluskíðun í Fjallabyggð, og býður fyrirtækið hjartanlega velkomið í sveitarfélagið, en telur ekki rétt að ganga til samninga um einkaleyfi að svo stöddu.

Rekstraryfirlit fyrstu sjö mánuðina lagt fram til kynningar.

Rekstrarniðurstaða er 34 milljónum betri en tímabilsáætlun gerir ráð fyrir. Tekjur eru 7 milljónum hærri, gjöld 23 millj. lægri og fjárm.liðir 4 millj. lægri.

Lögð fram til kynningar samantekt frá ráðstefnunni um jarðskjálftahættu á Norðurlandi sem haldin var á Húsavík 6.- 8. júní s.l.

Lagðar fram til kynningar upplýsingar frá Sambandi ísl. sveitarfélaga um evrópsku lýðræðisvikuna sem venja er að skipuleggja í kringum miðjan október.

Lögð fram til kynningar fundargerð 244. fundar stjórnar Eyþings frá 26. ágúst 2013.

Þar kom m.a. fram að fyrirhugaður er fundur með innanríkisráðherra 11. september 2013 um almenningssamgöngur á vegum Eyþings.

Bæjarráð samþykkir að færa til fundartíma bæjarstjórnar til 12. september, þar sem bæjarstjóri mun sækja fund ráðherra.