Bæjarráð Fjallabyggðar

Vegna erindis frá Teikn á lofti ehf. bókaði skipulags- og umhverfisnefnd á 101. fundi sínum 25. október s.l.
"Í framhaldi af umræðu að deiliskipulagi Hóls og Skarðsdals var nefndin sammála um að gert verði deiliskipulag af útivistarsvæðum í Fjallabyggð. Nefndin leggur áherslu á að um útboð á deiliskipulagsvinnu verði að ræða og tekið til umræðu við fjárhagsáætlun fyrir næsta ár."
Bæjarráð samþykkir að fela bæjarstjóra að ræða við hönnuð um frumhönnun að deiliskipulagi í Hólsdal.

Fyrir bæjarráði liggur beiðni frá rekstraraðila skíðasvæðisins í Siglufirði um hækkun gjaldskrár.

Eingöngu eru lagðar til verðhækkanir hjá fullorðnum. Börn í 1. og 2. bekk Grunnskóla Fjallabyggðar fái vetrarkort frí, og 3. til 10. bekkur fái vetrarkortið á 3.000.  Einnig að framhaldsskólanemar frá Fjallabygg fái vetrarkort á 5.000.
Bæjarráð samþykkir umbeðna hækkun og felur íþrótta- og tómstundafulltrúa að kynna niðurstöðu bæjarráðs fyrir frístundanefnd.

Í tengslum við erindi stjórnar Síldarminjasafns Íslands, komu á fund bæjarráðs, Örlygur Kristfinnsson og Guðmundur Skarphéðinsson.

Bæjarráð samþykkir að vísa ósk um endurnýjun rekstrarsamnings til umfjöllunar við gerð fjárhagsáætlunar 2011. 

Mikael Mikaelsson, sem hyggst setjast að á Vermundarstöðum í Ólafsfirði,óskar í erindi sínu eftir því að settar verði vinnureglur varðandi tíðni snjómoksturs á þessu svæði. 
Bæjarráð vísar til sameiginlegra reglna sveitarfélagsins og Vegagerðar um mokstur að Bakka allt að þrisvar í viku.

Rætt um útgjaldaramma fjárhagsáætlunar.
Bæjarráð samþykkir að fela bæjarstjóra að leggja fram tillögur á næsta fundi.  Í framhaldi koma tillögur til umfjöllunar í nefndum.

Á fund bæjarráðs mætti formaður Heilbrigðisnefndar Norðurlands vestra, Arnrún Halla Arnórsdóttir og Sigurjón Þórðarson heilbrigðisfulltrúi til að ræða mögulegan samstarfssamning við Fjallabyggð um heilbrigðiseftirlit.
Bæjarráð samþykkir að leggja til við bæjarstjórn að gengið verði til viðræðna við Heilbr.nefnd Norðurlands vestra.

Fulltrúar snjóflóðaseturs Veðurstofu Íslands, Harpa Grímsdóttir og Jón Kristinn Helgason, komu á fund bæjarráðs og kynntu snjóflóðahættumat sem unnið hefur verið fyrir skíðasvæðin í Skarðsdal og Hólsdal.

Endanleg skýrsla mun berast sveitarfélaginu í næstu viku og í framhaldinu verður hættumatið sett í almenna kynningu.
Þennan dagskrárlið sátu einnig íþrótta- og tómstundafulltrúi og fulltrúi rekstraraðila skíðasvæðisins í Skarðsdal.

Fundur starfsmanna Heilbrigðisstofnunar Fjallabyggðar og forsvarsmanna fyrirtækja í Fjallabyggð samþykkti að óska eftir að sveitarfélagið taki að sér að reikna út raunverulegan sparnað tillagna í fjárlagafrumvarpi 2011, líkt og gert var á Vestfjörðum og stendur fyrir dyrum hjá sveitarfélaginu Skagafirði.
Bæjarráð telur eðlilegt að verða við framkomnum óskum.

Í erindi útgefanda Árbókar Ólafsfjarðar er sveitarfélaginu þakkaður stuðningur við útgáfu ritsins 2007-2008.
Jafnframt er því komið á framfæri að ritið er opið fyrir innsent efni frá sveitarfélaginu.

Lögð fram til kynningar, ársfjórðungsskil sveitarfélaga á fjárhagslegum upplýsingum til Hagstofu Íslands fyrir tímabilið janúar - september 2010.

Skrifstofu og fjármálastjóri lagði fram upplýsingar um launakostnað frá 01.01.2010 til 31.10.2010.
Fram kom að heildarlaunakostnaður þessa tímabils er um 82% af áætluðum launakostnaði ársins.

Fundargerð lögð fram til kynningar.