Bæjarráð Fjallabyggðar

Lagt fram vinnuskjal deildarstjóra fræðslu-, frístunda- og menningarmála dags. 31. mars 2022 er varðar umsóknir um starf rekstraraðila tjaldsvæða í Fjallabyggð ásamt fylgiskjölum. Í vinnuskjalinu kemur fram að auglýst hafi verið eftir rekstraraðilum og hafi umsóknarfrestur runnið út 25. mars. Þrjár umsóknir bárust og voru þær yfirfarnar af deildarstjóra fræðslu-, frístunda-, og menningarmála og markaðs- og menningarfulltrúa með tilliti til skilyrða og áherslna í auglýsingu. Í vinnuskjalinu er lagt til að gengið verði til samninga við Kaffi Klöru ehf.

Bæjarstjóri lagði fram og fór yfir fundargerðir stjórnar Leyningsáss ses. Í máli hans kom að ráð sé fyrir því gert að lokið verði við vegagerð að nýju upphafssvæði á skíðasvæðinu í Skarðsdal í sumar. Fyrir atbeina sveitarfélagsins hefur náðst að fjármagna flutning á öllum lyftum innan svæðisins og tengdar framkvæmdir. Sveitarfélagið mun ræða frekar við Leyningsás ses. um byggingu nýs skíðaskála.

Formaður leggur til að framkvæmd verði könnun á viðhorfum eldri íbúa í Fjallabyggð hvað varðar húsnæðismál í sveitarfélaginu, lagt er til að könnun taki til íbúa 60 ára og eldri. Áætlaður kostnaður er 1,7 millj.kr. Einnig lagði formaður fyrir fundinn drög að spurningalista sem Rannsóknarstofnun Háskólans á Akureyri (RHA) hefur mótað í samvinnu við bæjarstjóra.

Lögð fram auglýsing Umhverfis-, orku- og loftlagsráðuneytisins um styrki til verkefna sem stuðla að eflingu hringrásarhagkerfis á Íslandi.

Lagt fram til kynningar yfirlit staðgreiðslu fyrir janúar til mars 2022. Staðgreiðsla fyrir tímabilið nemur kr. 329.259.597,- eða 99,08% af tímabilsáætlun 2022.

Bæjarstjóri lagði fram og fór yfir rekstraryfirlit fyrir janúar og febrúar og launayfirlit málaflokka janúar til mars.

Lögð fram drög að endurskoðuðum samstarfssamningi Dalvíkurbyggðar og Fjallabyggðar um rekstur tónlistarskóla.

Lögð fram drög að stofnanasamningi milli Félags íslenskra hjúkrunarfræðinga og Fjallabyggðar f.h. hjúkrunarheimilisins Hornbrekku. Stjórn Hornbrekku samþykkti samninginn fyrir sitt leyti á 32. fundi sínum og vísaði honum til umfjöllunar í bæjarráði.

Lagt fram erindi Sýslumannsins á Norðurlandi eystra, dags. 31.03.2022 er varðar beiðni um umsögn vegna umsóknar Sigurðar Egils Rögnvaldssonar, Fossvegi 13, 580 Siglufirði um tímabundið áfengisleyfi fyrir Skíðaskálann Skarðsdal vegna Skíðahátíðar á Siglufirði á tímabilinu 8. til 18. apríl 2022.

Lagt fram ódagsett erindi Þorleifs Gunnlaugssonar f.h. stjórnar Römpum upp Ísland er varðar verkefnið Römpum upp Ísland.

Lagt fram vinnuskjal deildarstjóra fræðslu-, frístunda- og menningarmála dags. 30. mars 2022 er varðar erindi Jónínu Kristjánsdóttur og Halldórs Ingvars Guðmundssonar dags. 29. mars hvar óskað er styrks í formi nota af íþróttasal einu sinni í viku í sex vikur til starfrækslu íþróttaskóla fyrir börn fædd 2016 til 2020.

Lagt fram vinnuskjal deildarstjóra fræðslu-, frístunda- og menningarmála dags. 31. mars 2022 er varðar erindi Guðmanns Sveinssonar f.h. Ástarpunganna hvar óskað er styrks í formi afnota af Tjarnarborg þann 30. apríl n.k. vegna fjölskylduskemmtunar og dansleiks, þ.e. svokallaðra „Verbúðar-tónleika“, hvar lögin úr þáttunum Verbúðin verði flutt. Fram kemur í umsögn deildarstjóra að kostnaður vegna húsaleigu og rútuferða nemi 208 þúsundum og að ef til komi þá rúmist styrkur innan fjárheimilda.

Lagður er fram tölvupóstur Svanfríðar Halldórsdóttur og Gunnars L. Jóhannssonar dags. 30. mars 2022. Í tölvupóstinum er þakkað fyrir samstarf og jákvæðni þegar verið var að koma upp áningarstöðum í Ólafsfirði í nafni Ungmennafélagsins Vísis ásamt og að benda á ýmislegt sem lagfæra þarf nú þegar áningarstaðirnir eru að koma undan vetri.

Lagt fram til kynningar erindi Sambands Íslenskra sveitarfélaga dags. 30. mars 2022 er varðar bókun stjórnar sambandsins vegna frestunar gildistöku ákvæða í lögum sem fjalla um barnaverndarþjónustu og umdæmisráð, einnig er lagt fram erindi sambandsins hvar óskað er frestunar á gildistöku ofangreindra ákvæða.

Lagt fram til kynningar erindi Sambands Íslenskra sveitarfélaga dags. 30. mars 2022 er varðar bókun stjórnar sambandsins þann 25. mars um átak um hringrásarhagkerfið.

Lagt fram til kynningar erindi Sambands Íslenskra sveitarfélaga dags. 25. mars 2022 er varðar viðmiðunarreglur um framlög sveitarfélaga til stjórnmálasamtaka sem bjóða fram til sveitarstjórna.

Lagt fram til kynningar erindi umhverfis- og samgöngunefndar dags. 30. mars 2022 er varðar umsögn um frumvarp til laga um fjarskipti, 461. mál

Lagður fram tölvupóstur Hrefnu Hallgrímsdóttur f.h. Innviðaráðuneytisins dags. 4. apríl 2022 er varðar tilkynningu um innsetningu tillagna að breytingum á lagaákvæðum, vegna tilfærslu fasteignaskrár frá Þjóðskrá yfir til Húsnæðis- og mannvirkjastofnunar (HMS), í samráðsgátt.

Lögð fram til kynningar fundargerð 908. fundar stjórnar Sambands íslenskra sveitarfélaga.