Bæjarráð Fjallabyggðar

Lagt fram minnisblað markaðs- og menningarfulltrúa dags. 15.01.2019 varðandi uppfærslu á vefumsjónarkerfum og/eða lokun undirsíða.

Bæjarráð samþykkir að bjóða íþróttafélögum sem enn eru með aukasíður hjá Fjallabyggð að taka við rekstri vefsíða sinna áður en þeim verður lokað af öryggisástæðum og að fela markaðs- og menningarfulltrúa að fá verðtilboð í uppfærslu á vefsíðu Bókasafns Fjallabyggðar. Einnig óskar bæjarráð eftir tillögu og kostnaðaráætlun markaðs- og menningarfulltrúa varðandi veflausnir fyrir Héraðsskjalasafn Fjallabyggðar og Listaverkasafn Fjallabyggðar.

Lögð fram drög að samningi um innheimtuþjónustu fyrir Fjallabyggð við Motus ehf og Lögheimtuna ehf.

Bæjarráð samþykkir drögin og felur deildarstjóra stjórnsýslu- og fjármála að undirrita samninginn og leggja fyrir bæjarráð.

Niðurstaða bæjarráðs færð í trúnaðarbók.

Lögð fram drög að endurskoðuðum samningi Dalvíkurbyggðar og Fjallabyggðar um samrekstur Tónlistarskólans á Tröllaskaga.

Bæjarráð samþykkir drögin og felur bæjarstjóra að undirrita samninginn og leggja fyrir bæjarráð.

Lagt fram til kynningar vinnuskjal vegna viðauka 14-16 við fjárhagsáætlun fyrir árið 2018.

Einnig er leiðrétting vegna gjaldfærslu á langtímakröfu v. Brúar, afstemming á innri leigu og viðhald fært á milli liða, auk þess sem innleiðing v. Persónuverndar er flutt á milli ára. Þá er launapotti ráðstafað.

Áhrif viðaukans á rekstrarniðurstöðu fjárhagsáætlunar 2018 er kr.150.930.- sem mætt verður með hækkun á handbæru fé.

Bæjarráð leggur til við bæjarstjórn að viðaukinn verði samþykktur.

Lagt fram afrit af bréfi Björgunarsveitarinnar Tinds, dags. 15.02.2019 til Jóns Helga Björnssonar forstjóra Heilbrigðisstofnunar Norðurlands (HSN) vegna vettvangsliðateymis í Ólafsfirði. Í bréfinu kemur fram að björgunarsveitinni hafi ekki reynst mögulegt að manna í sjálfboðavinnu vettvangsliðateymis í Ólafsfirði sem sinna átti fyrsta viðbragði/hjálp við útkall sjúkrabifreiðar í Ólafsfjörð frá Siglufirði samkvæmt samningi við HSN. Í bréfinu kemur fram að aðilum hafi í upphafi verið kunnugt um að erfiðlega gæti reynst að manna teymið og að Björgunarsveitin Tindur segi sig frá verkefninu.

Bæjarráð lýsir áhyggjum sínum af stöðu sjúkraflutninga í Ólafsfirði og samþykkir að boða Jón Helga Björnsson forstjóra HSN á fund til þess að fara yfir málefni sjúkraflutninga og upplýsa ráðið um næstu skref.

Lagt fram erindi Jóns Valgeirs Baldurssonar fyrir hönd H- listans þar sem óskað er eftir því að fulltrúar Heilbrigðisstofnunar Norðurlands HSN og Björgunarsveitarinnar Tinds verði kallaðir á fund bæjarráðs til að fara yfir stöðu vettvangsliðateymis og sjúkrabíls í Ólafsfirði.

Bæjarráð vísar í 5. lið fundargerðar þessarar þar sem fyrir liggur að bæjarráð ætlar að óska eftir því að Jón Helgi Björnsson forstjóra HSN mæti á fund til þess að upplýsa ráðið um stöðu sjúkraflutninga í Ólafsfirði og næstu skref.

Lagt fram erindi Steinmars H. Rögnvaldssonar f.h. Tengis hf, dags. 13.02.2019 er varðar aðstöðu á jarðhæð Ráðhússins, Gránugötu 24, vegna ljósleiðaravæðingar á Siglufirði.

Bæjarráð samþykkir að veita Tengi hf. aðstöðu á jarðhæð Ráðhússins vegna ljósleiðaravæðingar á Siglufirði og felur bæjarstjóra og deildarstjóra tæknideildar að ganga frá samningi þess efnis.

Lögð fram fyrirspurn formanns Öryrkjabandalags Íslands ÖBÍ, dags. 13.02.2019 til sveitarfélaga vegna notendaráðs fatlaðs fólks.

Bæjarráð samþykkir að óska eftir umsögn deildarstjóra félagsmáladeildar.

Lagt fram til kynningar erindi Óttars Guðjónssonar f.h. kjörnefndar Lánasjóðs sveitarfélaga ohf., dags. 11.02.2019 þar sem auglýst er eftir framboðum til stjórnar Lánasjóðsins. Frestur til að skila inn tilnefningum til kjörnefndar rennur út kl. 12 á hádegi mánudaginn 4. mars nk. Boðað verður til fundar föstudaginn 29 mars nk. á Grand hóteli í Reykjavík í samræmi við lög um hlutafélög.

Lagt fram erindi Dagbjartar Í. Guðmundsdóttur og Herdísar Erlendsdóttur f.h stjórnar Hestamannafélagsins Glæsis, dags. 14.02.2019 þar sem þess er óskað að fá að koma á fund bæjarráðs eða viðkomandi nefndar til þess að fylgja eftir erindinu er varðar öryggi og aðkomu sjúkrabíla á hesthúsasvæðinu og mokstur reiðleiða.

Bæjarráð samþykkir að óska eftir umsögn deildarstjóra tæknideildar og í framhaldinu að boða forsvarsmenn stjórnar Hestamannafélagsins Glæsis á fund ráðsins.

Niðurstaða bæjarráðs færð í trúnaðarbók.