Fréttir

Stjórn Verkalýðsfélagsins Vöku á Siglufirði hefur samþykkt ályktun þar sem skorað er á Sturlu Böðvarsson samgönguráðherra og samgöngunefnd Alþingis að beita sér fyrir því að áætlunarflug verði ekki lagt af til Sauðárkróks, líkt og Íslandsflug áformar.Frá Sauðárkróki hafa verið rútuferðir til Siglufjarðar í tengslum við flugið. Í ályktun Vöku segir að með áætlunarfluginu og rútuferðunum hafi tekist að halda uppi almenningssamgöngum við Siglufjörð."Margir félagsmenn í Vöku nýta sér þessa þjónustu og er þá rétt að nefna sérstaklega eldra fólk, sem er mjög margt í félaginu. Falli þessi þjónusta niður þá er Siglufjörður nær samgöngulaus við umheiminn, nema á einkabíl. Þetta myndi færa okkur áratugi aftur í tímann og valda bæjarbúum miklum óþægindum. Við teljum það algjöra nauðsyn að okkur verði tryggðar þessar flugsamgöngur þar til að við höfum möguleika á öðrum leiðum, með Héðinsfjarðargöngum og flugsamgöngum í gegnum Akureyri," segir í ályktun Verkalýðsfélagsins Vöku á Siglufirði.Samkvæmt upplýsingum Morgunblaðsins munu sveitarstjórnarmenn á Siglufirði og í Skagafirði eiga fund með samgönguráðherra á næstu dögum þar sem flugið til Sauðárkróks verður til umræðu.

Snjóflóðavarnargarðarnir Stóriboli og Litliboli sunnan við Siglufjörð hafa enn sannað gildi sitt en nú liggur fyrir að snjóflóð sem féllu í þekktum snjóflóðafarvegum á Siglufirði um miðjan janúarmánuð voru stærri og féllu lengra en menn höfðu talið en mikill snjór var þarna á þessum tíma allt fram í byrjun febrúar. Örlygur Kristfinnsson hjá Veðurstofunni á Siglufirði segir að í snjóflóðahrinu vestanlands og norðan sem fylgdi óveðri sem gekk yfir landið dagana 13. til 18. janúar hafi tvö stór snjóflóð fallið í Ytra-Strengsgili og Jörundarskál og meðfram leiðigörðunum Stórabola og Litlabola sunnan Siglufjarðar. Örlygur segir að varnargarðarnir sunnan bæjarins hafi þarna sannað varnarmátt sinn með því að bægja flóðunum frá byggðinni. Flóðin hafi uppgötvast 18. janúar þegar óveðrinu létti og menn telji nú nokkuð víst að þau hafi fallið 14. janúar en þann dag hafi reyndar nokkur hús verið rýmd á Siglufirði. Féllu 100 metra niður fyrir endann á Stórabola"Núna síðustu daga eftir þíðuna sem hefur staðið frá 10. febrúar hefur komið í ljós að þessi snjóflóð hafa verið stærri og fallið lengra en greina mátti í fyrstu. Þannig hefur flóðið úr Strengsgilinu fallið um 100 metra niður fyrir endann á varnargarðinum Stórabola og brotið á leið sinni grindverk við frárennslisræsi lítillar tjarnar þar í farveginum. Þá er talið líklegt að snjóflóðin tvö hafi náð saman og skarast þar sem gamli fjarðarvegurinn liggi á þessum stað," segir Örlygur.Hann segir garðana hafa verið reista til þess að verja stóran hluta af suðurhluta Siglufjarðar þar sem oft hafi þurft að rýma hús áður. Þær rýmingar séu hins vegar eiginlega alveg úr sögunni með tilkomu varnargarðanna. "Þess má geta að Stóriboli hefur áður sannað gildi sitt eða árið 1999 þegar hann leiddi stórt snjóflóð frá byggðinni. Þannig að það er tvímælalaust mikið gagn af þessum varnargörðum," segir Örlygur að lokum. Frétt af mbl.is

Atvinnuþróunarfélag Norðurlands vestra veitti Háskólanum á Hólum Hvatningarverðlaunin 2003. Guðmundur Skarphéðinsson formaður Atvinnuþróunarfélagsins afhenti Skúla Skúlasyni rektor verðlaunin, á Hólum föstudaginn 27. febrúar. Verðalaunagripurinn var að þessu sinni listaverk skorið í tré, eftir Erlend Magnússon listamann, ásamt verðlaunaskjali. Háskólinn á Hólum þykir sérlega vel að verðlaununum kominn en, á heimasíðu skólans er eitt af markmiðum skólans eftirfarandi:“....að efla starfsemi sína á sviði byggðamála í víðum skilningi, með þeim hætti að tengja í ríkara mæli núverandi nám og rannsóknir þessum mikilvæga málaflokki og stefna að því að þjálfa og mennta fólk til að verða frumkvöðlar í nýsköpun og uppbyggingu atvinnu og menningarstarfsemi á landsbyggðinni”. Stjórn Atvinnuþróunarfélags Norðurlands vestra veitir árlega einu fyrirtæki eða stofnun, sem telst hafa skarað framúr hvatningarverðlaun. Markmiðið með þeim er eins og nafnið bendir til að hvetja til nýsköpunar en um leið að vekja athygli á því sem vel er gert á Norðurlandi vestra.Verðlaunin eru nú veitt í fimmta sinn en áður hafa fengið verðlaunin:Síldarminjasafnið á Siglufirði fékk verðlaunin í fyrra fyrir að vera veglegur minnisvarði um merkilegan þátt í atvinnulífi Siglufjarðar og raunar landsins alls.Hestamiðstöðin á Gauksmýri í Húnaþingi vestra fékk verðlaunin fyrir árið 2001 fyrir þann kjark og áræði að byggja upp afþreyingu sem tekið er eftir um allt land.Vesturfarasetrið á Hofsósi fékk hvatningarverðlaunin fyrir árið 2000 enda eitt merkasta fyrirtæki sem starfrækt er á landinu.Kántrýbær á Skagaströnd fékk hvatningarverðlaunin fyrir árið 1999 og var það í fyrsta sinn sem þau voru veitt.

Stjórn Atvinnuþróunarfélags Norðurlands vestra ákvað á fundi sínum 23. janúar 2004 að veita Háskólanum á Hólum hvatningarverðlaun ársins 2003. Félagið veitir verðlaunin árlega til fyrirtækja eða stofnana sem skarað hafa fram úr í starfsemi sinni. Verðlaunin eru nú veitt í fimmta sinn. Háskólinn á Hólum þykir sérlega vel að verðlaunum kominn og er þeim óskað áframhaldandi velgengni í uppbyggingu skólans. Afhending verðlaunanna fer fram á Hólum þann 27. febrúar kl. 11:30. Verðlaunagripurinn er listaverk eftir Erlend Magnússon listamann, ásamt verðlaunaskjali. Nánari upplýsingar gefur Baldur Valgeirsson framkvæmdastjóri Atvinnuþróunarfélags Norðurlands vestra.

Nú liggja fyrir endanlegar tölur um íbúafjölda á Siglufirði þann 1. desember 2003. Árið 2003 bjuggu á Siglufirði 1438 íbúar og hefur þeim fækkað um 17 frá árinu áður.Frá árinu 2000 hefur íbúum fækkað um 122 og á 10 ára tímabili hefur íbúum fækkað um 343, en árið 1993 voru íbúar Siglufjarðar 1781.

Bæjarráð Ólafsfjarðar hefur samþykkt ályktun þar sem segir að í ljósi framkominna upplýsinga um minni þenslu í kjölfar stóriðjuframkvæmda á Austurlandi, óski bæjarráð Ólafsfjarðar eftir því að stjórnvöld endurskoði ákvörðun sína um tímasetingu framkvæmda við Héðinsfjarðargöng

Meirihluta bæjarstjórnar Siglufjarðar hefur samþykkt að leggja til við bæjarstjórn að Runólfur Birgisson, framkvæmdastjóri útgerðarfyrirtæksisins Siglfirðings ehf. verði ráðinn bæjarstjóri á Siglufirði. Gert er ráð fyrir að Runólfur taki við starfinu 4. mars nk.

Safnaráð Evrópu hefur sent út tilkynningu um að Síldarminjasafnið á Siglufirði sé meðal 40 evrópskra safna, sem hafa verið valin til áframhaldandi keppni um evrópsku safnaverðlaunin 2004. Hefðin er sú að dómnefnd skoðar öll þau söfn sem tilnefningu hljóta og velur um 60% þeirra til aðalkeppninnar. Fram kemur í vefriti menntamálaráðuneytisins, að á árlegum fundi Safnaráðs Evrópu, sem að þessu sinni verður haldinn í Aþenu 5.-8. maí í vor, verða úrslit kunngerð og safnaverðlaunin veitt. Til þessa fundar er boðið fulltrúum þeirra safna sem halda áfram í keppninni.Frétt af mbl.is

dadadadada

dsfdsfsdf