Fréttir

Leikskólinn hefur opnað nýja heimasíðu og er slóðin á henni www.leikskolinn.is/leikskalarEldri heimasíða verður ekki uppfærð en nýja síðan er auðveldari í vinnslu og ætti að gefa foreldrum enn betri upplýsingar.

Í gærkvöldi var haldinn fyrsti kynningarfundur samstarfsnefndar um sameiningu í Eyjafirði og var hann hér á Siglufirði. Fundurinn tókst afar vel, mikið fjölmenni mætti á fundinn og augljóst mál að mikill áhugi er fyrir því að kynna sér málin til hlýtar. Þrír fulltrúar samstarfsnefndar, Sigrún Björk Jakobsdóttir, Unnar Már Pétursson og Valdimar Bragason, fluttu framsöguerindi og síðan var opnað fyrir umræður og fyrirspurnir. Margar ágætar athugasemdir komu fram og fólk var vonandi einhvers vísari eftir þessar góðu umræður.Bæjarstjórn Siglufjarðar boðar til fundar um sameiningarmálin í næstu viku og verður sá fundur fimmtudaginn 29. september.Myndin er fengin af heimasíðu Steingríms og sýnir hluta fundarmanna.

Málefnaskrá vegna sameiningarkosninga þann 8. október nk. hefur nú verið dreift í hús á Eyjafjarðarsvæðinu. Hægt er að nálgast málefnaskránna á heimasíðu Sameiningarnefndar og er slóðin http://www.eyfirdingar.is/pdf/malefnaskra.pdfFólk er hvatt til þess að kynna sér málefnaskránna jafnframt því að mæta á þá kynningarfundi sem eru framundan, þann fyrri n.k. mánudag.

Nokkuð hefur vafist fyrir fólki hvernig sameiningarkosningunum er háttað eða hversu mörg sveitarfélög þarf til að samþykkja sameiningu 9 sveitarfélaga í Eyjafirði.Ef tillaga sameiningarnefndar hlýtur ekki samþykki íbúa í öllum hlutaðeigandi sveitarfélögum, en meirihluti þeirra sem afstöðu taka í atkvæðagreiðslu um sameiningartillögu lýsir sig þó fylgjandi sameiningu, skal greiða atkvæði að nýju innan 6 vikna í sveitarfélögum þar sem tillaga var felld. Skilyrði er að tillagan hafi verið samþykkt í amk tveimur af þeim sveitarfélögum er tillagan náði til.Dæmi: Ef sameining yrði t.d. samþykkt á Akureyri, Grýtubakkahreppi og Siglufirði en felld í öllum hinum sveitarfélögunum þá væri það að líkindum nóg til þess að kjósa yrði aftur innan 6 vikna í þeim sveitarfélögum sem höfnuðu sameiningu.Að lokinni síðari atkvæðagreiðslu er sveitarstjórnum sveitarfélaga þar sem sameiningartillaga var samþykkt heimilt að ákveða sameiningu þeirra sveitarfélaga. Þetta verður þó ekki gert nema tillagan hafi verið samþykkt í a.m.k. 2/3 sveitarfélaganna og að því tilskyldu að í þeim sveitarfélögum búi a.m.k. 2/3 hlutar íbúa á svæðinu.Sameiningarnefnd getur ákveðið að leggja fram nýja tillögu að sameiningu sveitarfélaga ef tillaga nefndarinnar er felld í atkvæðagreiðslu.

Fyrirhugaðir eru tveir kynningarfundir á Siglufirði vegna sameiningarkosninga í Eyjafirði þann 8. október nk.Fyrri fundurinn verður á vegum Samstarfsnefndar um sameiningu sveitarfélaga í Eyjafirði og verður hann þann 19. september nk. á Kaffi Torgi. Fundurinn verður auglýstur nánar þegar nær dregur. Síðari fundurinn er opinn borgarafundur um sameiningarmál og verður hann haldinn fimmtudaginn 29. september nk. Bæjarráð Siglufjarðar boðar til fundarins og verður hann auglýstur nánar þegar nær dregur.

Á fundi bæjarráðs Siglufjarðar þann 30. júní var eftirfarandi ályktun samþykkt og send fjölmiðlum og sjávarútvegsráðuneyti."Bæjarráð Siglufjarðar lýsir yfir miklum vonbrigðum og áhyggjum af stöðu mála varðandi loðnuveiði í sumar og leggur áherslu á að rannsóknir og veiðar verði ekki slegnar af strax heldur verði leitað allra leiða til þess að af loðnuveiði geti orðið á þessu sumri þar sem um gríðarlega mikla hagsmuni er að ræða fyrir þau sveitarfélög sem hlut eiga að máli og þar með landið allt. Leggur bæjarráð til að kannaðir verði möguleikar á að gefa út bráðabirgðakvóta á loðnu sem byggir á þeim upplýsingum sem þegar liggja fyrir.”

Opnuð hefur heimasíða vegna sameiningarmála í Eyjafirði á slóðinni http://www.eyfirdingar.is/

Eftirfarandi frétt er tekin af fréttasíðunni skip.is"Undanfarið hafa línubátar sem róið hafa frá Siglufirði verið að fá afla sem jafnvel elstu menn skáka ekki með tröllasögum. Á stóru svæði hefur veiðin verið slík að jafnvel verður að skilja eftir bala í sjó. Svo segir á heimasíðu Landssambands smábátaeigenda en þar eru aflabrögðin kölluð stjörnumok. Aflinn hefur verið allt að 500 kíló á balann og fer ekki undir 200 kíló á svæðinu. Í gær landaði einn báturinn 8 tonnum af fiski en sá afli fékkst á 28 bölum, 400 króka, og fyrir stuttu lagði annar 10 bala með línu sem beittir voru fyrir grásleppuvertíð og var aflinn 4,8 tonn. Þá hefur einnig heyrst af 12 tonna afla á 24 bala.Dágott kropp á færinFærabátar eru einnig að fá góðan afla, en oftar er það þannig að góð línuveiði fer ekki saman við góða handfæraveiði.Þessi mikla veiði er að fást allt frá 20 föðmum niður á dýpið, 70 - 80 faðma. U.þ.b. 10% hefur reynst ýsa, en annars er aflinn fallegur þorskur, 3 - 4 kg. Venjan er sú á þessu svæði að ýsan hverfur um þetta leiti og snýr til baka í ágúst.Sjaldgæft „vandamál“Það er skondin hlið á þessum frábæru fréttum að einn trillukarl á staðnum á orðið lítið eftir af kvótanum en allnokkra beitta bala í frysti. Nú stendur hann frammi fyrir því „vandamáli“ hvað hann eigi að þora að taka marga bala á sjóinn, segir á heimasíðu LS."Frétt af www.skip.is

Undanfarnar vikur hefur afli smábáta verið afar góður og fjöldi báta hefur verið að landa hér undanfarið. Í maímánuði er aflinn að nálgast 400 tonn af smábátum og ljóst að hann fer vel yfir 400 tonn í mánuðinum þar sem allir bátar eru á sjó í dag.Hluti af þessum afla er unnin hér á Siglufirði en einnig fer stór hluti á markað, yfir 200 tonn hafa farið í gegnum Fiskmarkað Siglufjarðar í þessum mánuði.Útlit er fyrir að þessi góða veiði haldi áfram enda spáin góð og sífellt að bætast við fleiri bátar til löndunar.

Kosið verður um sameiningu sveitarfélaga í Eyjafirði í haust og er vinna vegna þessa vel farin af stað. Sveitarfélögin 9 sem í hlut eiga hafa öll tilnefnt fulltrúa í samstarfsnefnd um sameiningu og hafa verið stofnaðir starfshópar í kringum ákveðna málaflokka. Fulltrúar Siglufjarðarkaupstaðar eru Ólafur Kárason og Unnar M.Pétursson.Á næstunni verður opnuð heimasíða þar sem hægt er að nálgast upplýsingar um vinnu samstarfsnefndarinnar og síðar verður málið svo kynnt rækilega í sveitarfélögunum. Slóð heimasíðunnar verður www.eyfirdingar.is