Fréttir

Skíðafélag Ólafsfjarðar fer af stað með byrjendanámskeið um leið og veður leyfir. Skráning er hjá Þuríði Guðbjörns í síma: 847 9967. Frekari upplýsingar má svo finna á símsvara félagsins: 878 1977 eða á síðu þjálfara  http://blog.central.is/alpaskiol

Íþróttamiðstöðin á Siglufirði verður opnuð  sunnudaginn 10. febrúar og verður opin framvegis á sunnudögum milli kl. 13:00 og 17:00. Að þessu tilefni verður frítt í sund næsta sunnudag í sundlauginni á  Siglufirði.

Dósamóttakan í Ólafsfirði hefur ekki verið opin síðan um áramót. Mun dósamóttakan opna aftur fimmtudaginn 7. febrúar og verður hún í andyri á Námuvegi 2, í húsnæði Sigurjóns Magnússonar ehf (áður MT-bílar). Nú verður bara opið einu sinni í viku, á fimmtudögum frá kl. 17:00-18:30. Það er Skíðafélag Ólafsfjarðar sem sér um dósamóttökuna.

Byrjað er að undirbúa dansleik á Ketilási, sem halda á laugardaginn 26. júlí.  Ætlunin er að dansleikurinn verði fyrir 45 ára og eldri og sérstaklega fyrir þá Ólafsfirðinga, Siglfirðinga, Fljótamenn og aðra af hippakynslóðinni sem skemmtu sér á Ásnum á árunum frá 1968.  Í dag verður opnaður vefur á moggablogginu http://www.ketilas08.blog.is/  þar sem nánari fréttir verður að finna og þar  geta gestir tjáð sig um málið.

Kötturinn verður sleginn úr tunninni á öskudag kl. 13:00 í íþróttamiðstöðinni í Ólafsfirði

Af gefnu tilefni bendum við fólki á að upplýsingasími skíðasvæðis á Siglufirði er 878-3399, þar eru lesin inn skilaboð á hverjum degi.

Félag leikskólakennara, menntamálaráðuneyti, Samband íslenskra sveitarfélaga og Heimili og skóli, standa fyrir „degi leikskólans“ þann 6. febrúar, en þann dag árið 1950 stofnuðu frumkvöðlar leikskólakennara fyrstu samtök sín.

Á fundi bæjarráðs Fjallabyggðar þann 24. janúar sl var tekin ákvörðun um að lækka álögur á bæjarbúa Fjallabyggðar vegna fasteignaskatts um tæplega 6 milljónir króna. Ákveðið var að lækka álagningu fasteignaskatts á íbúðarhúsnæði úr 0,475% í 0,400%. Auk þess var ákveðið hækka afslátt fyrir aldraða og öryrkja um 5% og hækka tekjuviðmiðun um 3,3%.

Umf. Glói sendi 11 keppendur á Stórmót ÍR sem fór fram í hinni glæsilegu frjálsíþróttahöll í Laugardalnum í Reykjavík dagana 19. og 20. janúar sl. Fjöldi keppenda frá Siglufirði vakti mikla athygli og ekki síður hinn góði árangur sem okkar fólk náði.